یاغیشلی هاوالار و ایلدیریم حاقیندا بعضی معلوماتلار
دونیادا سانییهده 100، بیر گونده ده 8 میلیون اطرافیندا ایلدیریم میدانا گلمکدهدیر. بیر ایل ایچینده بیر آدامین ایلدیریم طرفیندن چارپیلما احتیمالی 1/600،000. دیر. دیگر مئتئورولوژی کاراکتئرلی طبیعی فلاکتلرده اولدوغو کیمی، ایلدیریم طرفیندن چارپیلما احتیمالینی و ایلدیریملاردان اؤتری اولان جان و مال ایتکینلرینی ان آزا ائندیره بیلمهمیز اوچون اینسانلاریمیزین اولجه ملوماتلاندیریلماسی شرطدیر. آیریجا ایجتیمایتده ایلدیریمین میدانا گلمهسی و ایلدیریمدان قورونما مؤوضوسوندا یئرلشمیش چوخ اسکیک و سهو اولان معلوماتلارین دا دوزلدیلمهسی لازیمدیر.
ایلدیریم، قوربانلارینی داها چوخ تارلادا ایشلرکن، آتا مینرکن، وئلوسیپئد (چرخ) سوررکن، داغا دیرماشارکن، چؤلده اوینایارکن، بالیق توتارکن، آغاج آلتیندا دایانارکن، چوبانلیق ائدرکن، نورمال تئلئفونلا دانیشارکن، دوشده ایکن، اوزرکن و یا کیچیک گمیلرله دنیزه آچیلمیشکن توتماقدادیر. هارادا اولسانیز اولون اوّلجه ایلدیریمدان قورونماق اوچون بو 30/30 قایداسینا اویوم ساخلایین: شیمشک چاخدیقدان سونرا 30 سانییهدن داها آز بیر مدت ایچینده گؤی سس-کویونو ائشیتدییینیز آندان ان سون گؤی سس-کویوندن 30 دقیقه کئچنه قدر ایلدیریم تهلوکهسی ایچیندسینیز. گؤی گورولتولو بیر فیرتینایا توتولدوغونوز زامان ان یاخشی قورونما ایچری گیرمکدیر. اگر بینا و آوتوموبیل کیمی باغلی بیر سیغیناجاق مؤوجود دئییلسه یوکسک یئرلردن و تک قالمیش آغاجلاردان موطلق اوزاق دایانمالیسینیز. آچیق اراضیده اگر ساچینیز دیکلشمهیه باشلاییرسا، درینیز سیزلاییرسا و یا چاتیرداما کیمی بیر سس ائشیدیرسینیزسه، دقت! سیزه هر آن ایلدیریم چارپا بیلر. تهلوکه وضعیتینده درحال یا سرعتله آلچاق بیر یئره قاچین یا دا یئره چؤمئلین و باشینیزی دیزلرینیزین آراسینا آلاراق هدفی کیچیلدین. اصلا یئره یاتمایین. اگر یوکسک و دوز بیر یئردهسیزسه باشینیزی مومکون اولدوغو قدر آلچاقدا یاپیشین، لاکین یئره اوزانمایین. بعضن ائلئکتریک یوکونون بؤیوک قیسیمی ایلدیریمین چاخدیغی نقطهنین یاخینینداکی سطحده سیخلاشار. بو سطح آخینی بدنه کئچهرک، اؤلومه و یارالانماغا سبب اولا بیلمکدهدیر. بونون اوچون، مومکون اولدوغو قدر یئره چؤکمهلی و آیاق بارماقلارینین اوزرینده دایاناراق یئرله تماسی ان آزا ائندیرملیییک. گرگینلیک فرقی یاراتماماق اوچون ده آیاقلاریمیزی بیرلشدیرملیییک. گؤی گورولتولو و شیمشکلی بیر فیرتینانین حؤکم سوردویو هاوا شرطلرینده، اولان یئره گؤره آشاغیدا یئکونلاشدیریلان قایدالارا دقت ائدیلمهلیدیر؛
آچیق اراضیده:
1- سیغینا بیلجیینیز بیر بینا و یا آوتوموبیل آختارین.
2- بینا و یا آوتوموبیل یوخسا، ماغارالار، قورو خندک و آرخلار، وادیلر، کانیون و یا ان آز بویونوزلا عینی یوکسکلییه صاحب آلچاق آغاج چوخلوقلاری آراسینداکی بوشلوقلار سیغینا بیلجیینیز ان اعتبارلی یئرلردیر.
3- اگر سیغینا بیلجیینیز هئچ بیر یئر یوخسا اولدوغونوز یئردکی ان یوکسک جیسیمدن اوزاق دورونوز.
4- اگر اطرافینیزدا داغینیق شکیلده بیر نئچه دنه آغاج اولسا، ان یاخینینیزداکی آغاجا، او آغاجین یوکسکلییینین ایکی قاتی قدر اوزاقلیقدا بیر یئرده باشینیزی دیزلرینین آراسینا قویاراق یئره چؤمئلینیز. اصلا تک باشینا دایانان بیر آغاجین آلتینا گیرمه یین.
5- دوشرگه واسطه و وسایطلری، بالیق قارماغی، گولف چوبوغو، قازما و کورک کیمی مئتال جیسیملری اَ لینیزده ساخلامایین. وئلوسیپئد، موتورسیکلئت، تراختور کیمی اوستو آچیق واسطهلری ترک ائدین.
6- داغ و تپهلرین دوروقلاریندان، آچیق ساحهلردن، تئل هؤرگولردن، قاتار یولوندان، مئتال پالتار ایپلریندن، آچیق تقدیم ائتدیرمه و کومالار ایله هر جور ائلئکتریک چاتدیرا بیلن جیسیملردن قاچینین.
7- تئل هؤرگو، تئلئفون و ائلئکتریک خطلری، مئتال بورو دؤشنیلمهسی، رئلس و پولاد ایستروکتورلارداکی ایشلره آرا وئرین.
8- اوزور و یا سو سطحیندکی بیر قاییقدا اولورسانیزسا، سودان درحال چیخین، قاییغی ترک ائدین. چای، گؤل و بنزری سولاردان اوزاق دورونوز.
9- یئرله مئتال بیر ائکیپمان ایله علاقهلی اولان تراختور و یا شوم کیمی آلت و واسطهله ایشله مه یی بوراخین.
10- قروپ حالینداسیزسا، بیر-بیرینیزدن ان آز 1.5 متره اوزاقدا دورونوز.
11- داغدا آغاج سرحدیندن داها یوکسکده سینیزسه، درحال آغاجلیق ساحهیه ائنین.
بینا ایچینده:
1- باغچا و بالکونونوزداکی یونگول اشیالاری و داشینا بیلر مئتال واسطهلری ایچرییه آلینیز.
2- پنجره و قاپیلاری باغلایین. ایلدیریم سیزی آچیق پنجرهدن گیرهرک ده چارپا بیلر.
3- قاپاتیلامایان قاپی و پنجرهلردن، سوبا، اوجاق و بوخاریلاردان، رادیاتورلاردان، مئتال بورولاردان، تووالئت و کووئتتن (واندان)، فیشی پریزه تاخیلی ائلئکتریکلی ائو آلتلریندن اوزاق دورونوز.
4- دوش ائتمه یین، دوش آلمایین. ال له قاب-قاجاق یومایین. مئتال سو ته سیساتیندان اوزاق دورونوز.
5- آچیق قابلارداکی یانیجی و پاتلاییجی ماددهلردن اوزاق دورونوز.
6- پالتار ایپیندکی پالتارلاری توپلامایا جهد ائتمیین.
7- فیرتینا آنیندا چوخ لازیم اولمادیقجا کابئللی تئلئفونلا دانیشمایین، کابئللی تئلئویزیا سئیر ائتمه یین. ائلئکترونیک ائو آلتلرینین فیشینی چکینیز.
8- اینسان بدهنینه یاخین توتولان ساچ قوروتما ماشینی، تراش ماشینی کیمی ائلئکتریکلی آلتلری ده اصلا ایستیفاده ائتمه یینیز و یا تعمیر ائتمهیه جهد ائتمه یین.
آوتوموبیلده:
1- اگر سیاحتده سینیزسه نقلیات واسطهسینین ایچینده قالین. اوستو باغلی آوتوموبیللر ایلدیریمدان قورونماق اوچون اولا بیلهجک ان اعتبارلی یئرلردن بیریدیر.
2- گؤی گورولتولو فیرتینا کئچه نه قدر واسطهنیزی یولون ساحلینده اعتبارلی بیر یئره چکینیز. واسطهنیزین اوزرینه آغاج آشماماسینا، سئل سولارینا قاپیلماماغا و اولا بیلهجک بیر یول قضاسینا سبب اولماماغا دقت یئتیرین.
3- فیرتینا سونراسی، یولون سطحی سودان گؤروله بیلمیرسه او سویا اصلا گیرمه یین.
